Beste urtebetez bertsomovie original eta politak ikusteko aukera eskaini digu aurtengo edizioak ere. Saritu gabe utzi behar izaten genituen lan onengatik, aurtengo ediziorako sarietan aldaketa batzuk egitea erabaki genuen.

11 lan jaso ditugu guztira eta honako hauek dira 2017ko Bertsomovieda lehiaketako sariak jasoko dituztenak:

Helduen mailan:

• LEHEN SARIA: 1000 € bertsomovie onenari: Hartza zu (Txakur gorria)

Gazteen mailan:

• LEHEN SARIA: 300 € bertsomovie onenari: Egin Irri (Berrizko Bertso Eskola)

Sari orokorrak:

• IKUSLEEN SARIA 500€ : Botilen hilerritik (Ekaitz Goikoetxea)
• BERTSORIK ONENEN SARIA 250€ : Ahanzturaren haran  (Ane Labakaren bertsoak)

Aipamenak:

• 200 €-ko saria: Botilen hilerritik (Ekaitz Goikoetxea)
• 200 €-ko saria: Naturak zoratzen gaitu (Gontzal Belategi)

Jakin, denok zaudetela gonbidatuta Maiatzaren 19an Beasaingo Igartza Jauregian arratsaldeko 19.00etan izango den sari-banaketa ekitaldira.

Zorionak sarituoi  eta MILA ESKER parte hartu izanagatik. Datorren urtean ere parte hartzera animatuz, nahi duzuen arte!

Bertsomovieda-ko antolakuntza.

Gaur eguerditik hasi eta Maiatzaren 12ko eguerdira bitartean aurtengo ediziora bidalitako bideoak bozkatu ahal izango dituzue gure webgunean. Gogoan izan 500€-ko saria dagoela jokoan, eta astebeteko epe honetan boz gehien jasotzen dituenarentzat izango da.

Eskerrik asko zuen parte-hartzeagatik eta zorte on guztioi!

Jaso ditugu dagoeneko 2017ko Bertsomoviedan aurkeztutako lanak. Eskerrik asko bideoak egiteko lana hartu duzuen guztioi, badakigu denbora asko eskatzen duela eta guztiontzat adina sari ez dugun arren tokatzen zaigu hori aitortzea.

Maiatzaren 5ean eguerditik aurrera bozketa martxan jarriko dugu, eta gogoan izan Maiatzaren 12a dela bozketako azken eguna.

Zorte on guztioi eta onenak irabaz dezala!

Urteak joan, urteak etorri, aurten ere hemen da nazioarteko bertsomovie lehiaketa: bertsomovieda. Zure bertsoklip, irudiz hornitutako bertso sorta, edo besteren baten bertso + irudiekin osatutako edozein bideo aurkez dezakezu… eta baita bururatzen zaizun beste edozein formatutako bideoren bat ere.

Zer den zehazki ez dakizula? Lasai, xinplea da eta: bertsoren bat ageri den bideo bat, gutxienez 7 segundokoa, grabatu, internetera igo, eta guri horren berri ematean datza lehiaketa.  Edozein bertsok balio du, nork berea ala besteena, eta sariak mota guztietakoak dira, gazteenentzat bi sari, eta helduentzat beste bi. Horiez gainera, publikoaren sari potolo bat, eta bertso onenak dituen bertsomoviearentzat ere sari berezi bat; guztira 2500€ saritan.

Ez dago inongo mugarik: mundu osora zabaldutako lehiaketa da, edonork har dezake parte, taldeka ala bakarka… gutxienez bertso bat eta bideo bat uztartzea da ezinbesteko baldintza bakarra. Sariak honakoak dira:

Gazteentzat:
300€ bertsomovie onenari
Helduentzat:
1000€ko lehen saria
Guztientzat
500€ko saria botorik gehien biltzen dituen bertsomovieari
200na €ko bi sari, epaimahaiak erabakitako bi aipameni
Bertsorik onenak dituen bertsomovieari 250€

Gozatzeko lehiaketa bat antolatu dugunez, bideoak bertsomovieda.com webgunean ikusgai egongo dira epea ixten denetik, eta gogokoena bozkatzeko aukera ere izango da. Apirilaren 23tik maiatzaren 4ra arte egongo da zabalik lanak aurkezteko epea, eta maiatzaren 5etik maiatzaren 12ko eguerdiko 12ak arte egongo da bozka emateko aukera zabalik.

Antolakuntzatik parte hartzera animatu nahi dugu mundu guztia. Eta biziki eskertuko dizuegu zuen hedabide eta erakundeetan zabalkundea emanez zuen hondar aletxoa jartzea. Eskerrik asko aldez aurretik.

Xehetasun gehiago nahi izanez gero, elkarrizketaren bat eskaini, edo dena delakorako, jarri lasai gurekin harremanetan, honako bideen bidez:

Eposta: bertsomovieda@gmail.com

Twitter: @bertsomovieda / Facebooken: bertsomovieda

Aurreko edizioen arrakasta ikusi ondoren badator seigarrena ere.

Datozen egunotan izango duzue gure berri, egon azti!